Fasnacht mache bi de Zepf?

Mir sin e Basler Clique wo z Ziri dehai isch und s gwehnlige Basler Cliquelääbe pflägt. Wenn de bi uns mechtsch Fasnacht mache, denn kasch am beschte scho pfyffe oder drummle. Aber au Vorträbler sin bi uns nadyrlig härzlig willkomme! D Iebige finde allewyl am Mittwuch Zoobe in unserem Stammhuus «Zum Weissen Wind» im Zircher Oberdorf statt. Dert träffe mr is allewyl vor dr Stund an unserem Stamm in dr Baiz. D Iebig goht am viertel vor Achti (19:45h), drennt fir d'Pfyffer und d'Dambure, los.

D Goschtym und d Larve wärde in Basel gstaltet. Unseri Lampe entstoht in Basel bi unserem Clique-Kinschtler. E gmainsame Pfyfferli-Bsuech isch e Höhepunggt in dr Vorfasnachtszyt. Nadyrlig mache mir vor dr Fasnacht au Marschiebige. Die finde bi uns halt aifach au z Ziri statt (e Spass fir Jung und Alt... ;-). Kurz vor dr Fasnacht zieht denn dr Zug vo Haimweh-Basler aabe an Rhy und speetischtens ab dr Ladäärne-Vernissage am Sunntig Zoobe schwäbe mr denn zämme in Fasnachtshimmel.

Dr Bummel startet allewyl in Ziri und ändet au wieder dert. Sälbstverständligg gniesse mr aber die letsche Ehrerunde z'Basel, bevor is denn dr Car zrugg an See bringt.

Aber au unterem Johr kasch bi uns eppis erlääbe!

Vor de Summerferie gits alls e gmainsams Usfliigli mit eme gmietlige Mittagässe oder enere Aktivität. Und allewyl im Herbscht fyyre mir dr «Basler Oobe». Dodrzue lade mr jewyls e Clique us Basel ii, zem gmainsam z Ziri go gässle und e gmietlige Oobe zämme z verbringe.

Wettsch gärn bi uns mitmache? Denn kontaggtier is!